DIET PLATEAU البلاتوه: أسباب ثبات الوزن

"مشيت علي دايت كتير و بردو مفيش فايدة هما هما ال 3-4 كيلو و شكرا

 كل محاولاتي في الدايت فشلت – بلاتو" "

 "و مش قادر أنتظم مش متقبل نفسي و لازم أخس بس بحب الأكل

س-عديت علي الكلام ده كم مرة سواء قلته بنفسك أو سمعته من الناس ؟

ج- إيه مخك هنج, كتير صح ؟ " مبعدش يا جيمي "

البلاتو أو “ DIET PLATEAU “ هو ثبات الوزن مع طول مدة الدايت نتيجة لإنخفاض في معدل الحرق. 

يعني إيه؟ يعني حتي لو بتاكل أقل و ماشي علي نفس النظام الي خسسك قبل كده بردو مش هتخس لأن الي داخلك بس هو الي بيتحرق و الباقي ليه متخزن زي ما هو .

طيب أعمل إيه أنا دلوقتي؟ من غير زعيق, هنزود معدل الحرق فنخدعه و هنعرف إزاي كمان شوية.

البلاتو ده هو عدو الإرادة أو عزيمة الدايت اللدود و هو الي بيخلينا نلف في دواير

 " أعمل دايت----أخس شوية----الله مبخسش ليه----بلاتو----بلاتو—كمان بلاتو-----لا أنا هاكل أنا زهقت----ف أتخن----- أزعل إني تخنت------أكتئب و أكل تاني عشان زعلان ------ف أتخن تاني-------لا كفاية هعمل دايت من النهار ده دايت و يياضة و يياضة و دايت ...." و هكذا

لازم نفهم أسباب ثبات الوزن او البلاتو و نحتويه كده عشان نوصل لهدفنا في الأخر بدل الدوامة دي.

خلينا نتفق سوا  الأول إن كلمة DIET دي سخيفة و تكئب لوحدها من قبل ما تبتدي أصلا و ده طبعا نتيجة لعادات قديمة و ثابتة في مجتمعنا الجميل كبرنا عليها كلنا و الي أي فسحة أو مناسبة أو حتي ترفيه مرتبط بالأكل و مش أي أكل لا ده من النوع المدمر  " العيد أقرب- هناكل فتة و رقاق و مكرونة بشاميل و نحلي كمان "

لازم نحط في دماغنا اننا مش ماشيين علي دايت فترة و هنفك و نخربها لما نوصل لهدف معين , لا ده إسمة تغيير نمط حياة " Healthy Lifestyle" و مش عشان شكلي يبقي حلو او أخلص من التنمر لاني فوق الوزن " Over Weight" لا ده عشان صحتي لأن السمنة هي السبب الرئيسي في أمراض كتير زي :

1.   مشاكل القلب  “Cardiovascular disorders”

2.   إرتفاع ضغط الدم “ Hypertension“

3.   السكر “ Diabetes”

4.   دهون علي  الكبد " Fatty Liver"

5.   ارتفاع الكوليسترول “Hypercholesterolemia”

6.    إنسداد الشرايين “Atherosclerosis”

7.    مشاكل الإنجاب " Infertility"

8.   التهابات المفاصل “ Arthritis“

9.   الإكتئاب “Depression”

ندخل في الموضوع بقي " مبخسش ليه" أو البلاتو و ثبات الوزن أسبابه إية ؟ معدل حرقي أقل من الطبيعي ليه؟

أسباب ثبات الوزن – بلاتو الدايت – Diet Plateau

السن: معدل الحرق بيقل طبيعي فوق 27 سنة او الثلاثينات عموما وكل ما بنكبر (خصوصا البنات)

مواعيد الأكل مش منتظمة:  الوقت بين الوجبات يفضل يكون 5 ساعات
 ( 9 ص- 3 م- 9 م )

تفويت الوجبات: باكل مرة واحدة في اليوم لما اخلص شغلي و بفوت وجبة  الفطار الي هي اهم وجبة أكثر وجبة بتتحرق

مبشربش مياه مظبوط : الجسم محتاج 3 لتر مياه  في اليوم عشان ميخزنش مياه و يتنفخ و يقلل الحرق

معنديش معلومات كفاية عن طبيعة جسمي: او عمري ما عملت In-body /قياس الدهون و العضلات في الجسم عشان أعرف معلومات: عن

1-كتلة الجسم /Body Mass IndexBMI

2-كتلة العضلات Body Muscle Mass

3-كتلة الدهون  Body Fat Mass

4-السعرات الحرارية  الي محتاجها في يومي Daily Calorie Intake

  5-معدل الحرق أو الأيض الغذائي Metabolic Rate

  

 السعرات الحرارية الي داخلالي من الأكل أكثر من الي محتاجها بكتير: لازم بيقي عندنا برنامج نحسب بيه السعرات في أي حاجة بناكلها
 ( برشح تطبيق Fat Secret application   )
 و طبعا لما تعمل IN-Body  هتعرف جسمك محتاج سعرات اد إيه (برشح موقع (Calculator.net 

السهر و قلة النوم: السهر بيقلل من إفراز هرمون النمو Growth Hormone الي هو أصلا منشط للحرق و نقصه بيقلل عملية الحرق. السهر و قلة النوم عموما  بيأثروا علي مستويات الهرمونات الي بتساعد في عملية الحرق زي

1-اللبتين-Leptin-: وده مسئول عن تنظيم الشهية و  بيحسسك بالشبع و قلة النوم بتقلل مستويات اللبتين فبتزود الشهية.

2-الكورتيزولCortisol--: بيزود نسبة السكر في الدم  و السهر و قلة النوم، بتزود مستويات الكورتيزول في الجسم نتيجة الإجهاد العصبي والضغط النفسي و بالتالي بتزود الشهية و بتراكم الدهون في منطقة البطن بالتحديد.

أنيميا فقر الدم و نقص الهيموجلوبين: الأكسجين عامل أساسي في عملية حرق الدهون و لذلك نقص الهيموجلوبين نتيجة الأنيميا بيقلل حمل كرات الدم الحمراء للأكسجين فبيقلل الأكسجين في تيار الدم و بالتالي الحرق بيقل و مبنحسش. 

الفري-Cheat Meal: الفري مسموش يوم الفري  لا هو وجبة واحدة بنحبها أوي و محسوب سعراتها كويس ضمن اليوم بناخدها كل سبع أيام  و يا حادق يا حلو علي فكرة, العشم الزايد في الفري بيضيع كل المجهود الي اتعمل ده غير كمان اننا لو مكلناش أكلة دسمة بنحبها من فترة للتانية بردو حرقنا هيقل لان الجسم ذكي جدا عاوزك متخسش لان طبيعته بناءة مش هدامه.

شرب العصير: أكل الفاكهة أفضل من عصرها, فكر شوية اسئل نفسك هل ثمرة فاكهة واحده عارف و حاسب سعراتها ولا كوباية عصير دي شوف بقي معموله من كم ثمرة ؟  هتعرف ليه مبنشربش عصير لو عاوزين نخس.

هزود في السلطة و الخضار عشان أشبع  :كل شيئ في الدنيا يساوي سعرات فلازم تاخد بالك من الكمية. مثلا طبق السلطة الصح المفروض يبقي مكون من طماطماية + 3 خيارات +جرجير + 3 عيدان خس بلدي مش كابوتشي عشان في زيوت. 
 وطبق الخضار المفروض يبقي 8 معالق يعني بوله صغيرة. 
الإفراط في السلطة أو الخضار يعني سعرات زيادة يعني تخزين دهون و خدوا بالكو ان الفلفل و البصل و الجزر من غير تسوية فيهم نسبة سكر عالية أوي فيستحسن نسويهم علي النار عشان السكر يتكسر.

( الناس الي مناعتها ضعيفة كل ما لونت في طبق السلطة كان أفضل للمناعة بس تاخد كمية قليلة )

ضعف العضلات: الجسم محتاج يبقي قوي عشان يقاوم طبيعته البناءة و يستسلم في الأخر و يسلم دهونة عن طيب خاطر .

التجويد: " ما أزود ربع رغيف يعني إيه الي هيحصل ؟ فرقت ربع من نص فرخة ؟ هاخد ده بدل ده" التجويد ثم التجويد علي الورقةز لازم نفهم ان لما دكتور بيديلك ورقة يا حرام بيبقي كاتبها بعد عناء طويل حساب للسعرات و توفيق أكل مع بعضه بناء علي نوعية الاكل و دوره في تحفيز هرمونات معينة و إنزيمات معينة ما الراجل دارس بره و جوه بردو  , تيجي انت تهدله ده كله و تجود من عندك طبيعي هيحصلك بلاتو.

إهمال الوجبات الخفيفة أو ال SNACKS: أكبر غلط , عاوز جسمك يحرق كل ساعه لازم تديلة snack مع كوباية مياه عشان متجوعش و تعك.
أفضل Snacks  علي مدار اليوم بين الوجبات ( خياره واحدة – ثمرة تفاح أحمر –جزرة واحده- خياره تاني-أخر خياره) كده بين الفطار و الغدا 5 ساعات كل ساعة بناكل فيها حاجة مع كوباية مياه و نفس الشيئ بين الغدا و العشا.

طب انا بشتغل و بنسي أعمل ايه ؟ عادي كلنا بننسي انا عن نفسي نسيت 2 Snacks  و أنا بكتبلكوا دلوقتي ايه المشكلة ؟ أهم حاجة نبقي فاهمين أهمية السناكس هنلاقي نفسنا بعد كده واخدين lunch box  معانا الشغل او مقطعين السناك و حطينه جمبنا في البيت عشان مننساش بس ده مش معناه ناخد سناكس فيها كالوري عالية.

  قلة  الحركةو إهمال الرياضة: الحركة من أهم منشطات الحرق Metabolic boosters  لازم نبقي فاهمين كده كويس عاوز تساعد نفسك يبقي تتمرن او تمشي او حتي و انت في المكتب تعمل تمارين بسيطة.

( إستنوا المقالات الجاية هقولكوا إزاي )

المشروبات: الينسون و النعناع و القهوة ( Espresso) و ما شابه, ده غير انهم فيهم زيوت طبعا بنحط عليهم سكر, هتقولولي ما سكر دايت هقولكم حتي ده لينا 5 حبات/ساشيت بس في اليوم
 (بفضل سكر Stevia لانة بيزودش السكر في الدم و بالتالي مبيأثرش علي إفراز الإنسولين الي بيخزن الدهون في الجسم).
 كذا دكتور و كذا بحث أثبتوا ان أعشاب الدايت الطبيعية الموثوق فيها  و الشاي الأحمر أو الأخضر بدون إضافات(قصدي منكهات) هم الأفضل كمشروبات في إنقاص الوزن و ممكن ناخد واحدة شاي بلبن خالي الصبح.

منع الدهون والكربوهيدرات والبروتين: حرمان يعني جوع يعني ناكل أكتر و نعك أكتر و نزهق أسرع حرمان الجسم من البروتين بيحرق   جلايكوجينGlycogen  من العضلات اللي بالتالي هتضعف ومعدل الحرق هيقل و حرمانه من الدهون يعني عدم استفادة بالفيتامينات الي محتاجة دهون عشان الجسم يمتصها  بس زي فيتامين B-Complex
Fat soluble vitamins)  (

  اللون البني- العيش و التوست السن: انتوا عارفين ان الحاجات السن و العيش البني بيتحط عليهم سكر بني و عسل اسود  حتي لو مش مكتوب انه مضاف " بس كده مش هكمل أكيد فهمتوا " أفضل عيش يتاكل هو العيش البلدي بتاع الفرن و شكرا.

الأدوية الغير موثوق فيها الي مش من دكتور ثقة : و ما أكثرهم- معظم أدوية الدايت بتسبب إكتئاب و بالتالي مع الوقت هتلاقي نفسك بتاكل كتير و بتتخن علي المدي البعيد ده غير ان ليها أثار جانبية كتيرة بتسبب مشاكل صحية خطيرة و ممكن تؤدي للوفاه في بعض لأوقات.

 القلق و التوتر: ( أنا لا ليا قريب ولا غريب ولا حبيب-Qouting Noga) كفاية دراما و خلينا إيجابيين عشان صحتنا النفسية بتأثر بردو علي الحرق.

 

بس خلاص, تقدروا تقولوا ان ال 20 سبب دول هم معظم أسباب ثبات الوزن و اتقالوا في مقالات و كتب و كورسات كتير, أنا بقي جمعت ده كلة و زودت خبرتي أنا  شخصيا مع الدايت طبعا بالاستعانة بدكاترة تغذية شطار.

يا ريت نحاول نتجنب كل الأسباب دي و نغير نمط حياتنا للأحسن و هتلاقوا نتيجة أكيد.

 متنسوش ال Follow & Subscribe

و إستنوا المقالات الجاية

"Healthy Life Style": مسموحات من غير ممنوعات

 "Boost Your Metabolism": أعلي معدل حرقي إزاي

Easy Workouts: تمارين سريعة في مكاني

Perfect Diet Starter: أفضل نظام تبدأ بيه دايت  

ًWeight Loss Boosters: أفضل دوية إنقاص الوزن

By Yara Ashraf Zayed